Mi fa peno de parla de Rougié Gensollen coumo se l’èro pas emé nàutrei. De tout biais, dins moun couar, l’es toujour.

Rescountrèri Rougié l’a bèn de tèms, dins un tèms que lou mitan prouvençalisto varés supourtavo pas gaire que de jouine mèstre d’escolo e proufessour aguèsson chausi la draio de l’óucitanisme e sa grafìo. E coumo èri un d’aquélei jouine, e bèn en tèsto, èri counsidera un pau coumo lou diable pèr leis ancian de l’AVEP. Annado setanto, annado peniblo, de garrouio e d’oustracisme, un mur de Berlin à de bouan entre nàutrei.

Quàuquei tèms après, en 1985, publiquèri lou rebat de moun travai sus lou tèste prouvençau de l’encastre toulounen, de la fin dóu siècle XVIII au mitan dóu siècle XIX, de tèste presenta e coumenta, douna en grafìo óuriginalo. Es à-n-aqueste moumen que Rougié, lou countràri d’un seitàri, mi countatè, tout diable qu’èri, pèr m’esplica qu’avié la memo toco de furna dins lei libre vièi e lei manuscri dóu tèms passa, en prouvençau d’eici. Mi faguè counouisse la revisto de l’AVEP [Association Varoise des Enseignants de Provençal], que mi l'abounèri. E maugrat nouastro diferènci de chausido grafico, coumo parlavian lou meme prouvençau, lou prouvençau d’aqui e noun uno lengo artificialo e saberudo, qualo que siegue, siguerian d’abord de coulègo, e fin finalo d’ami.

Despuei, ai toujour escambia emé Rougié, tant sus leis escri que lei biougrafìo de nouàstreis ancian. Aguèri de-longo la provo de soun grand serious, que voulié toujour verifica istouricamen ce qu’avançavo, e dounc que metié de-longo moun saché d’istourian à countribucien.

Ansin viajerian coutrìo dins un passat bèn mau counouissu, emé lou grand plasé de la descuberto, e toujour emé lou respèt pèr lou pople païsan, mestierau, oubrié d’antan que lou prouvençau èro sa lengo naturalo, e tamben emé lou respèt pèr lei tròup rare letru e saberu que l’escriguèron.

Es ansin qu’aguèri lou grand plasé de reçaupre Rougié e sa chourmo de l’AVEP pèr uno journado à La Segno.

Mai l’avié pas qu’acò. Rougié èro un republican de la bouano, fièr dóu republicanisme de nouàstreis àvi. Ansin siguè presènt tre la debuto au travai de nouastro assouciacien 1851, (que beilejàvi), engimbrado pèr prepara l’anniversàri de l’insurreicien republicano vareso de decèmbre 1851 contro lou còup d’estat de Louis Napouléon Bonaparte. E em’ éu, de bràvei coulègo de l’AVEP, coumo Lucian Maurel (qu’èro lou felen d’un insurgènt d’à-z-Aup), coumo lou pouèto Reinié Raybaud, coumo Jan Abello e bèn d’àutrei. Pèr Rougié, siguè l’óucasien de publica dins sa revisto de l’AVEP d’intervencien republicano en prouvençau de Charles Dupont, alias « Cascaioun » dins lou journau Le Démocrate du Var, en 1849-1850.

Vaqui. Ansin s'en van tant d’annado de rescouantre e de bouan travai, mounte faguerian traço.

Aro ma pensado esmóugudo va à sa gènto mouié, qu’ilustravo tant bèn seis escri.   

 

Reinat MERLE