Amics e collègas,

Sabètz de segur que sèm engatjats, la FELCO*, dins una batèsta ferotja contra aquela reforma deis collègis que, e passava, nos escanariá complètament.

E tenèm a dire que nòstra posicion es pas portada per l'immobilisme o lo corporatisme coma los tenents de la reforma o voldrián faire creire.

Vist la precaritat de nòstre ensenhament, que la reforma  agreujarà mai encara, far de nosautres de privilegiats es una insulta.

L'interdisciplinaritat, la pedagogia de projècte, la gestion de l'eterogeneitat, fai de decènnis que los ensenhaires d'occitan i son engatjats.

Mas se pòt pas faire d'interdisciplinaritat sens de coneissenças disciplinàrias solidas, çò que serà pas possible, amb una reforma que prevei pas d'autra plaça per un ensenhament de nòstras lengas que « lenga 2 » (çò qu'es quasi jamai causit), e qu'escafa de fach las magras possibilitats representadas fins ara per lo perlongament al collègi dels ensenhaments bilingues dins lo primari aquí ont n’i aviá.

Subretot, refusam aquela mesa en concurréncia sauvatja entre disciplinas e entre collègas que la reforma vòl installar sota pretèxt d'autonomia dels establiments.

* Federacion dels ensenhaires de lenga e de cultura d'òc.