Mistral, Memòri e raconte, 1906

Aquel ivèr, li gènt estènt tóuti uni e tranquile e countènt, car la vèndo di fourre anavo pas trop mau e se parlavo plus, gràci à Diéu, de poulitico, s’èro entrenca dins noste endré, pèr un pau s’espaça, de representacioun de tragèdi e de coumèdi ; e, coume ai deja di, emé touto la fogo de mi dès-e-sèt an, iéu ié jougave moun roulet. Dins aquelo entre-miejo, vers la fin de febrié, vai te faire de Diéu ! esclatè la Revoulucioun de 1848.
A l’intrado de Maiano, en un pichot oustau de tàpi, qu’avié ‘n autin davans sa porto, demouravo d’aquéu tèms uno vièio mameto que ié disien Riquello. Abihado à la modo dis Arlatenco anciano, pourtavo uno grand couifo aplatido sus la tèsto e sus aquelo couifo un capèu large d’alo e plat, de fèutre negre. De mai, avié si gauto encadrado dóu plechoun, espèci de fichu de cambrasino bloundo estaca souto lou mentoun. Vivié de sa fielouso e de si quàuqui cantounet. Mai, proupreto, assiéunado e bèn emparaulado, se vesié qu’avié degu èstre uno cafinoto.
Quand, emé moun saquet, à l’age de sèt à vuech an, iéu veniéu à l’escolo, tóuti li jour passave davans l’oustalet de Riquello ; e la vièio que fielavo. assetado vers sa porto sus soun banquet de pèiro, me sounavo, e me disié :
- Frederi, n’avès ges, à voste mas, de poumo roujo ?
- Sabe pas, ié respoundiéu.
- Quand vendras mai, mignot, aduse-me-n’en quaucuno...
E toujour óublidave de faire la coumessioun. E toujour dono Riquello, quand me vesié passa, me parlavo d’aquéli poumo. Talamen qu’à la fin iéu diguère à moun paire :
- I’a la vièio Riquello que toujour me demando de ié pourta de poumo roujo.
- La sacro vièio masco! respoundeguè moun paire en repetenejant, se ‘n cop te n’en parlo mai digo-ié : Soun pas maduro, ni d’aro nimai d’encaro.
Em ‘acò, quand la vièio me reclamè si poumo roujo :
- Moun paire, ié cridère, m’a di qu’èron pas maduro, ni d’aro nimai d’encaro.
La Riquello, à parti d’aqui, noun me parlè plus de si poumo.
Mai l’endeman dóu jour que, dins nòsti campagno, se fuguè couneigu li Journado de Febrié e que Paris avié prouclama la Republico, iéu, venènt au vilage, pèr saché li nouvello, la proumiero persouno que vau vèire à l’intra fuguè dono Riquello. Drecho sus soun lindau, requinquihado e afiscado, em’ uno bago de toupàzi que ié beluguejavo au det :
- Alor li poumo roujo, me faguè coume eiçò, aquest cop soun maduro ! Dison que van planta lis aubre de la liberta. N’anan manja, mignot, d’aquéli bòni poumo dóu paradis terrèstre... O Santo-Mariano, que cresiéu de te plus vèire ! Frederi, moun enfant, fai-te republican !
- Mai, Riquello ié diguère, avès bèn uno bello bago !
- Ah! lou pos dire, me faguè, qu’es bello aquelo bago ! L’aviéu plus messo ! tè, despièi que Bonaparte èro parti pèr l’isclo d’Eubo... Es un ami, qu’avian, un ami de l’oustau, que me l’avié dounado, dins lou tèms (ah! que tèms !) que dansavian la carmagnolo...

E dins soun oustau la vièio, en s’arrapant li raubo coume pèr danseja s’estremè ‘n crebant dóu rire.