Bulletin de l’A.V.E.P 1er trimestre 1997. n° 81

Aquéu dimenche 6 d’óutobre, qu’èra lou quaranto-unen coulòqui de l‘AVEP, erian... quaranto-un, vesès un pau ! Fasié un pichoun tèms fouaço tapa ; n’en vouas de niéulo ! Mai sian esta escàpi de douas ravasclado, un còup au restaurant, un autre còup à Balaguié. Vaqui lou rendu-comte de Reinié Merle que beilejé la journado en coumpagnìo de son ancian mèstre d’escolo, l’istourian segnen Marius Autran.

Lei entresegne de la visito soun esta douna per Marius Autran e Reinié Merle, toutei dous de vieillo famillo segnenco. M.Autran a publica fouaço libre sus l’istori de La Sègno. A fa l’escolo a de generacien de Segnen e es esta lounten elegi a la coumuno.

Lou matin, si recampan au Gau, davant l’archipel deis Embiez, à Siei Four. Fa gaire bèu, mai ploù pas.

Vesen au Levant lo massiu de Sicie, qu’es la pouncho la mai avançado dau litourau francès, eme sei calanc que davaloun sus uno mar que encuei boulego pas mau. Eis Embiez, sian à la baisso dau Massiu de Sicie, que ven se perdre eici dins la mar dau coustat dau pounen. Lei "phyllades" duro e griso de la couasto fan pensa à la Bretagno.

Mountan pièi dins lou massiu, dins la grando fourest coumunala de Siei Four, s’arrestan a l’ièro dei Masco per quauquei entresegne geoulougico : coumo lei Mauro, lou massiu de Sicie es un troç de l’encian countinen tirrenian, qu’oucupavo la plaça de la mar actualo. Fasié mouvimen vers lou nord, e a fa giscla de l’aigo lei sedimen (calcaires) de la mar qu’oucupava lou Var actuau. Ansin soun esta fourma lei mount darnier Touloun : Faroun, Coudoun, etc.

Prenen puei la poujado que nous meno à capelo de Nouastro Damo de Bouano Gardi, que cadun eici li dien La Bouano Maire. Es estado bastido à la debuto dau segle des-e-seten a cousta d’un vieil posto de gardo dei Siei-Fournen que surveillavo la mar.

Per lei Segnen, lei Siei-Fournen, etc., lou massiu e la capelo soun "Lou Mai". Que deven cado mes de mai un luè de peregrinagi e de sourtido familialo. L’a pas gaire, lou plan de Janas, en dessouto, ero oucupa per uno grando fiero tout lou mes de mai.

Sian a 360 m d’auturo e la visto es espetaclouso sus la mar, lou litourau varès e tout lou païs toulounenc.

La capelo fa limito entre la coumuno de Siei Four e la coumuno de La Segno, que s’es separado de la coumuno maire de Siei Four en 1657.

Davalan puèi per la fourest coumunalo de La Sègno, en s’arrestant sus la "corniche" per regardar lei calancs dau levant dau massiu, emé lei Dous Fraires, douas isclo bessounos prochi dau Cap Sicie.

S’arrestan à Fabregas, que soun noum indico d’activita encianas : eici passan dei vieillo roco primari, sourno o griso, (quarzites, phyllades, "lauvisso") au permian rouge (l’a de ferre).

Es miejou, e prenen la routo de la rado per Tamaris, qu’es un quartier de La Segno. Lou pendis de la coualo es ben a la calo dau mistrau, e dins leis annado 1880-90 lou famous Michèu Pacha n’en faguè uno estacien moudano. N’en soubro fouaço oustalas d’epoco, souventi fes dins un estile esoutico. Per Michèu Pacha, qu’avié fa fourtuno dins l’emperi outouman, Tamaris en ribo de la rado dau Lazaret dounavo d’er au Bousforo.

Se recampan un momentoun sus lou parking dau restaurant per regarda lei instalacien d’aquacuture e ce que soubro de la mitiliculturo.

Es tanben l’escasenço d’évouca la memori de l’escolo felibrenco de Tamaris. Apres manja, à quauquei pas dau restaurant, visitan lou fouart de Balaguier, que Richelieu faguet basti en 1634 per surveilla l’intrado de la rado de Touloun. Es en ribo de mar, e aven de la terrasso de sa tourre una visto espetaclouso sus Touloun. Lou fouart es aro un musèu de la marino e dau bagno fouaço interessant. Li passan un bouan moumen, d’autant que defouaro toumbo uno bravo raisso.

Finissen la visito en ribejan la rado, cousta segnen, en s’arrestan sus lou seti vueje dei encian Chantier de counstruccien navalo de La Segno. An tout rascla d’aquelo entrepreso que l’a des an fasié travailla 8000 persouno ! Un soci de l’AVEP, que travaillavo ei chantier, nous fa uno presentacien esmougudo.

Reinie Merle