Revue trimestrielle A.V.E.P. n°77, 1996.

Dominique e “La Tóuteno”

Revue trimestrielle A.V.E.P. n°77, 1996.

Presentacien de R.G :

Avèn parla eici mai d’un còup de La Tóuteno, facido tóutei lei dimècre, journalet escri en prouvençau de Touloun que pareissié à la fin dóu siècle passa. Avèn douna quàuquei sceno prouvençalo e de nouvello, tout signa d’escais-noum coumo : Benezi, Lally, etc.

Nous fa gau encuei de fa lou lume sus soun autour, bounadi lei recerco de Reinié Merle que gramacian pèr la coumunicacien qu’a bèn vougu nous faire.

Lou proufessour Reinié Merle es agrega d’istòri, a lou Capes de Letro mouderno, es Dóutour ès Letro e assoucia dóu C.N.R.S. de Mount-Pelié. Sabi pas se pren lou tèms de faire la partido ei bocho.

Es pèr dire qu’es un cercaire de proumiero. Entre autre, a publica recentament d’obro preciouso per nautre : Inventaire du texte provençal de la région toulonnaise (1986), e L’écriture du provençal de 1775 à 1840, qu’es sa tèsi, 1028 pajo (1990).

Soun darnier oubrage es en souscricien ; es un estùdi tras qu’impourtant : Les Varois, la presse varoise et le provençal, 1859-1910, toucant tout ce qu’es esta escri en lengo nouastro dins lei journau dóu tèms, dins uno pountounado que vigué nèisse la liberta de la presso, sus tóutei lei sujèt : poulitico, soucieta, religien, etc.

R. Merle - Dominique, Antoni, 1836 - 1906

Siéu en trin d’acaba un enquèsto sus l’escrituro dóu prouvençau dins lou Var entre lou Segound Empèri e la guerro de quatorge. Acò m’a fa rescountra, e de coùp que l’a mi leis a fa descurbi, de persounàgi bèn interessant.

Vouali parla ei legèire de l’AVEP, à la lesto, d’un d’aquélei, que mi sèmblo pourta leis ambiguïta e lei countradicien de soun tèms.

Aquel ome, lou rescountrèri d’abord en legissènt la pichoto presso dóu tèms : li signo Benezi e li douno de sceno pleno de santa poupulàri, sceno toulounenco, e mai que mai de Besagno, lou quartié poupulàri au levant dóu Cous Lafayette, entre lou Capèu Rouge e lou Cuou de Buou.

Es un pau lou disciple e lou rivau de La Sinso.

Puèi mi rèndi comte, toujour en legissènt aquelo presso, qu’es pleno d’alusien, de critico e, de coùp que l’a, d’un marridun que farié pòu encuei, que Benezi es qu’un deis escais-noum d’un escrivan mai qu’aboundous que signo : Rodolphe d’Orbel, Gaston de la Bayorre, X. de Briey, etc.

Es un escrivan francés que douno sei rouman en fuietoun dins la presso marsiheso e vareso de la fin dóu Segound Empèri e de la debuto de la Tresenco Republico ; pren sa matèri dins la realita loucalo e regiounalo : L’Incendie du Mourillon, La Mariage aux baïonnettes, Les Mémoires de Gaspard de Besse, Le Siège de Toulon en 1793, e un fube d’àutrei.

Descuérbi tambèn qu’es l’autour dóu proumié rouman-poulicié toulounen (d’autour anounime) qu’es esta tourna edita l’a pas gaire : L’assassinat de la rue Magnaque.

M’avisi que gouverno tambèn aquel ome, e toujour souto aquéleis escais-noum e bèn d’àutrei, plen de pichoun journau d’espaçamen, literàri, teatrau e satirique : Le Carillon, Le Touche-à-Tout (proumiero maniero), Toulon Journal, La Guêpe de Toulon, etc.

E viéu tambèn que signo, mai aqueste coùp de soun noum, d’óubràgi saberu sus leis epidemìo de coulera à Touloun, especialamen aquélei, terriblo, de 1865 e 1884.

Qu èri dounc aquéu Dominique prouteïforme ? Ges de bibliougrafìo, ges d’estùdi : falié dounc furna dins leis archiéu.

Nèisse à Grasso en 1836. Es l’enfant d’un gendarmo de Lourreno, que tournara au païs à la retrèto. Lou futur escrivan prouvençau es dounc sourti dei braïo d’un “estrangié” e acò mouastro la vitalita dóu prouvençau à l’époco.

Lou joine Dominique es naturalament bilingue, coumo tout lou mounde.

Intro joine à la Coumuno de Touloun, en 1856, coumo coumés de burèu e devèn puei cap dóu burèu de l’Estat-civiéu. Mai es pivela pèr lou desi de la recounouissènço literàri franceso. Fa que publico soun Teatre de Besagno à la fin de l’Empèri e à la debuto de la Republico.

Lou resson es grand e Dominique coumpren que l’a aquito tanbèn uno poussibilita de recounouissènço. Mai pòu s’agi eici que de recounouissènço loucalo ; la recounouissènço naciounalo passo pèr lou francés.

E vaqui dounc, à cousta de Dominique, autour francés, lou Benezi dei sceno toulounenco, e mai que mai de Besagno.

Besagno, segur que Dominique lou counouis bèn : rèsto au couar de Touloun, carriero dei Boucharié, e sa segoundo fremo es la fiho de l’acoucharello dóu quartié vièi.

Benezi a de ressoun dins la presso vareso dóu tèms, mai pousqué pas si faire publica pèr de bouan dins un libre, coumo La Sinso. E èron pas gaire coulègo, tóutei dous ! Rivau en literaturo, pas d’acòrdi en poulitico.

Dins aquelo passo de passien poulitico, La Sinso es republican, Dominique counservatour.

La Sinso est felibre, e Dominique a de longo critica lou Felibrige que s’enracinavo dins lou Var, mais es coulègo emé lei felibre toulounen lei mai “à drecho”.

En 1885 ; Dominique gouverno un journau nouvèu, Le Petit Toulonnais, que voulié councurrença lou republican Petit Var, mai lanço tambèn La Tóuteno, un semanié satirique en prouvençau, que viéura quàuquei mes en 1885-1886, e quauque tèms encaro en 1890 (mai bilingue, aqueste còup).

Es uno entrepresso óuriginalo, quàsi touto en proso, dins un tèms que s’escrivié subretout de vers en prouvençau.

Se dis facho pèr “dé félibrés doù gros grun”, mai es subretout facho pèr Dominique : signo K.Ramen seis article poulitique, e Benezi sei sceno toulounenco. Recampo de coulabouradou anounime, pousquèri n’en identifica la grand part : quàuquei felibre, quàuquei ome poulitique, tóutei encagna contro la municipalita radicalo de Touloun e soun cònsou Dutasta.

La vióulènci, lou marridun de La Tóuteno faguèroun rire, mai faguèroun tambèn uno marrido empressien e, dóu còup, Dominique, passa 1890, quité d’escriéure en prouvençau.

Mai avié moustra, de soun biais, que bèn entendu agradavo pas en tout lou mounde, que lou prouvençau poudié participa, en nourmalita, à la vido publico e poulitico, que si poudié escriéure en prouvençau d’article enfourmatiéu e poulemique, tant coumo en francés.

Aguèsson fa ansin aversàri e ami que, de segur, la lengo serié estado mai aparado que pèr lou plagnun sus la mouart dóu prouvençau. Mai acò es uno autro istòri...

Reinié Merle